Chief Minister Lalduhoma kaihhruaiin Thawhtanni khan Cabinet Room-ah Council of Ministers Meeting neih a ni a, he meeting-ah hian ram hmasawnna leh inrem siamna kawnga thutlukna pawimawh 19 an pawm (approved).
General Administration Department (GAD) hnuaiah Aizawl Venglai-a School Education ram (DLL 41 of 1992) chu Aizawl Venglai Local Council hnenah hlan chhawn remtih a ni a. National Song ‘Vande Mataram’ kum 150-na thlen lawmna tura ruahmanna siam te leh, Armed Veng South-a Home Department ram (DLL 41 of 2010) chu Armed Veng East Presbyterian Church hnenah hlan te an pawm a ni.
DP&AR lamah Mizoram chief secretary hlui Renu Sharma, IAS (Retd.) chu re-employment basis-in Advisor to the Government of Mizoram atana ruat chu pawm a ni a, The draft Mizoram Engineering Service Rules, 2026 pawh pawm a ni bawk.
Higher & Technical Education (H&TE) Department hnuaiah kum 2019 Cabinet thutlukna thlir nawn lehin, RUSA Scheme hnuai liau liaua post 72 siam tawh lakah, tun thlenga government college hrang hranga fixed remuneration-a thawk mek assistant professor 58-te regular appointment siamsak chu an pawm a ni.
School Education Department hnuaia Adhoc Grant-in-Aid School hrang hrangte sorkar hnuaia lak luh (provincialization) chu pawm niin Planning & Programme Implementation Department hnuaiah Mizoram Startup Policy, 2026 pawm a ni bawk.
Home Department atanga thu lut pali lai pawm a ni a, chungte chu The Mizoram Inner Line Pass Guidelines, 2026, The Aizawl City, Traffic Police Warden Scheme, 2026, leh halpuah leh thil puak thei khuahkhirhna tur, Draft The Mizoram Regulation of Fireworks Bill, 2026 te an ni.
Environment, Forests & Climate Change (EF&CC) hnuaiah hmunphiah (broom grass/broom stick) lakah royalty lak loh tur tia pawm niin, Irrigation & Water Resources Department hnuaia tui hman dan kalpui tur The Mizoram Water Information and Governance Bill, 2026 pawh pawm a ni.
District Council & Minority Affairs (DC&MA) hnuaiah CADC hnuaia thawk thubuai thar (convicted employee) mi 10-te hremna pek chungchang an pawm a, Rural Development department hnuaiah mipuite eizawnna chawikang tur Mizoram Visit Bharat – Guarantee for Rozgar & Ajeevika Mission (Gramin) Scheme, 2026 an pawm bawk.
Health & Family Welfare hnuaiah Draft The Mizoram State Medical Council of Homoeopathy Bill, 2025 pawmin, Fisheries Department hnuaiah The Mizoram Fisheries (Amendment) Rules, 2026 an pawm a ni.
Urban Development & Poverty Alleviation (UD&PA) Department hnuaiah khawpui hmasawnna chak zawk a awm theih nan Companies Act, 2013 hnuaiah Mizoram Urban Development Company din chu an remti a, in sak dan kaihhruaina siam thatna tur The draft Aizawl Municipal Corporation Building (Amendment) Regulations, 2026 pawh an pawm bawk.