Aizawl: Mizoram State Health Care Society chuan mipuite awlsam zawk nan mahni awm hmun atanga MUHCS card dil (apply) dan tur ruahman thar a nih thu a puang.
Sorkar hnathawk nghet leh mipui nawlpui man chawia inziak lut (General beneficiaries) te chuan muhcs.mizoram.gov.in portal-ah lutin card hi an dil thei tawh a ni a. Card diltute hian dil rual hian chhungkaw member tinte thlalak fiah tak (awm leh a chung lam lang) leh chhungkaw member tinte sorkar hriatpuina ID card mamawhte an ‘upload’ tel a ngai a ni.
Naupang kum nga hnuai lam tan chuan a hranpaa card siam a ngai lo va, a nu emaw a pa card an hman tawm thei ang.
He dilna hi Mizoram State Health Care Society-in a lo pawmpui (approve) fel hunah mahniin card hi an download thei nghal dawn a ni. Mahni a dil tum te tan hriat thiam awlsam nan Mizoram State Health Care Society YouTube Channel-ah kaihhruaina video siam a ni bawk.
Mizoram State Health Care Society thuchhuah hian category dang, Civil Pensioner leh GIA employee-te tan tun dinhmunah MUHCS Card hi a la siam ve theih rih loh thung a. Amaherawhchu, heng mite hi damdawi ina enkawl ngai an nih thut chuan, scheme-a an inziahluhna lehkha (Subscription form) hmangin MUHCS 2.0 hnuaia hamthatna awm te chu an dawng thei tho vang.
AB PM-JAY (Golden Card) hmang thei chhungkua tan Golden Card neih sa hmangin MUHCS hnuaia hamthatna a dawn theih a, a hranpa a MUHCS Card siam a ngai lo a ni.