Aizawl: MNF National Core Committee member R Tlanghmingthanga, ex-minister chuan, “India leh MNF inremna avanga inhung bikna Article 371 (G) kan neihte hi a hlu tak zet a. India Parliament meuh pawhin pass mah se, Mizoram Legislative Assembly rem tihna lo chuan hman ve ngawt a theih lo va. Forest (Conservation) Bill 2022 MNF sorkarin kan ram tana him lova a hriat avanga a lo hnawl tawh ZPM sorkar-in NGO leh party-te rawn lova an pass (adopt) ta ngawtte hi a pawi hle a ni,” a ti.
Thawhtannia MNF Hnam Run chhung inkhawmah thusawiin PWD Minister hlui ni bawk chuan, “MNF hunlai, PWD minister ka nih tirh khan Aizawl kawngte hi a la chhe hle a, nasa takin kan siam tha a. Tunhnu hian khangte kha theihnghilh a lo ni zo ta a. Thil tha tam tak sorkar hmasate khan he hnam leh he ram tan hian kan lo ti tawh a, hmasawnna ruhrel tam tak a lo din tawh a ni,” a ti.
R Tlanghmingthanga chuan hnama pianthar a ngaih thu sawiin, “Pathianin duh taka a siam he Mizo hnam chhanhim tur hian hnama kan pianthar a ngai a. He hnam venghim tur hian Pathianin mi dang daih, hnam dang daih a ruat lova, keimahni Mizote ngei kutah a awm a ni. Hnama min siamtu Pathianin min siam chhan leh ni tura min duh kan nih theih nan hnamah kan pianthar a ngai,” tiin ‘Pathian leh kan ram tan’ titu MNF an ni tih chu hre reng turin kalkhawmte a chah.
MNF party chu mahni hamhaina leh pumpui tihpuarna tur ringawt atana belh chi a ni ve tih sawiin R Tlanghmingthanga chuan, “Mahni inphat a ram leh hnam tana inhlantute awmna tur a ni. Kan kal tawh dan enin insiam thatna tur tam tak kan nei a, insiamtha chung zelin Pathian leh kan ram tan hmalam kan pan zel tur a ni,” a ti bawk.