Aizawl: Chief Minister Lalduhoma chuan CM Rubber Mission hmangin ram hectare 11,500 a zauah kung nuaih 51 chuang phun thar an tum tih a sawi.
Thawhlehni khan Hmunpui khawtlang chuan an khaw Community Hall-ah hmasawnna hna thar pathum — black top (bitumen) kawngpui thar, Health Sub-Centre building leh Quarters thar, bakah Chief Minister Rubber Mission (Phase-II) hnuaia Rubber Hectare 25 chinna an hmuhte lawmna inkhawm an buatsaih a. Chief Minister Lalduhoma chuan khuallian niin a telpui.
He hunah hian chief minister chuan Hmunpui khawtlang hmasawnna thar te chu a lawmpui tih sawiin, kawngpui thar Rs vbc 3 senga SASCI 2025-26 kaltlanga siam tak chu duat taka enkawl zui turin khawtlang mipuite a chah.
CM Rubber Mission chungchangah Chief Minister chuan Tripura State kalpui dan zirchianga Mizorama hman tan a nih thu a sawi a, mission hmang hian ram Hectare 11,500-a zauah Rubber kung nuai 51 chuang phun thar tum a nih thu a sawi a. Phase I: Mamit leh Kolasib District-ah Hectare 1,000-a zauin bul tanin, Phase II: District pariatah Hectare 2,575-ah kalpui leh niin, Hmunpui khua pawhin Hectare 25 (chhungkaw 24 tan) an chang ta tih a sawi.
Mizoram tana hmun pawimawh, Lengpui Airport khawl (DVOR) bunna hmun Hmunpui chu sorkarin a ngaisak reng tih sawiin, chief minister chuan an khaw power supply lakna kalkawng thar tur pawh survey mek a nih thu a sawi a, NABARD RIDF-30 hnuaia sak tak Sub-Centre thar chu tangkai taka hmang turin mipui a chah bawk.
Inkhawmah hian bialtu MLA Er. H. Lalzirliana pawhin sorkar hmalaknaah lawmthu a sawi a. Hmunpui Village Council Vice President H. Lalduhsanga chuan khawtlang aiawha lawmthu a sawi.