Aizawl: Rotary Club of Aizawl chuan Rotary Club of Pune Far East leh Suttatti Enterprises Ltd-te nen tangkawpin, Corporate Social Responsibility (CSR) hnuaia zirna tihhmasawnna hmanrua ‘Saksham eLearning Project’ hmangin Mizorama sikul 10 hnenah Smart TV hmanga zirtirna e-Learning Kit nimin khan McCabe Hall, Aijal Club, Aizawl-ah an sem a. He hunah hian Education Minister Dr. Vanlalthlana chu khuallian niin, sikul 10 hnenah learning kit hi a hlan a ni.
Khuallian Dr. Vanlalthlana chuan sikul 10 hnena Saksham eLearning Kit pek an ni chu lawmawm a tih thu sawiin, “Thingtlang sikul tê bera sikul naupangte pawh hian khawpuia zirlaite ang bawkin zirna tha an mamawh a. Rotary Club-ten hetiang hmanrua zirlai naupangte hnena an pe hi a lawmawm a, naupangte pawhin hma an sawn phah ngei ka beisei a ni,” a ti.
Minister chuan tunlai IT khawvelah Mizoram a hnufual thiang lo tih a sawi a, hemi atana sikul eng emaw zat tana hmasawnna tur hmanrua pek an ni chu lawmawm a tih thu a sawi bawk.
He hmalakna hi tunlai thiamna thar hmanga zirna changtlung leh tha zawk chhawpchhuahna tura ruahman a ni a. Saksham unit tinah hian Class 1 atanga Class 10 zirlai huam, software nena thlunzawm 43-inch Smart TV pakhat a awm a, a mamawh dan anga upgrade ziah tur a nih bawk avangin, zirna sang zawkah pawh a chhawm chhoh zel theih dawn a ni.
He hunah hian Suttatti Enterprises Ltd aiawh hotu lian te, Rotary hruaitute leh sawm bik mi thahnem tak an tel a ni.