Aizawl: Ek Bharat Shreshtha Bharat hmalakna hnuaiah Mizoram Larsap, General (Dr) Vijay Kumar Singh hovin nimin khan Gujarat, Maharashtra, Sikkim leh Goa-te state puitlinga hlan kai ni, ‘Foundation Day’ lawmna inkhawm chu Durbar Hall, Lok Bhavan, Aizawl-ah neih a ni.
He hunah hian Larsap chuan Prime Minister Narendra Modi hmalakna hnuaia hnam inpumkhatna programme ‘Ek Bharat Shreshtha Bharat’ chu Lok Bhavan leh Lok Niwas hrang hrangahte hman thin a nih thu sawiin, India rama chengte zinga hnam ziarang, nunphung, ei leh in, leh incheina inanlohna nasa tak awm chu India danglam bikna, ropuina leh chakna zawk a nih thu a sawi a; he hun hman hian India ram hriat chian lehzual kawngah kalkhawmte a puih ngei a beisei thu a sawi bawk.
He hunah hian Gujarat Larsap Acharya Devvrat, Maharastra Larsap Jishnu Dev Varma, Sikkim Larsap Om Prakash Mathur leh Goa Larsap Pusapati Ashok Gajapathi Raju te thuchah ngaihthlak a nih bakah, state hrang hrangte chanchin tarlanna video tawi thlir ho a ni.
Gujarat leh Maharashtra-te hi May ni 1, 1960 khan state-ah hlankai an ni a, Sikkim hi May ni 16, 1975 khan state puitlinga hlankai niin, Goa hi May ni 30, 1987 khan state puitlingah hian hlankai a ni thung.