US President Donald Trump-a chuan Chinese hruaitu, Xi Jinping-a’n indona kal mekah Beijing-in Iran hnenah ralthuam a thawn dawn lo tih a tiam tih a sawi.
Thawhlehnia a thuchhuah hi kar hmasaa Trump-a’n ni thum chhung China a tlawh haw hnua a tihchhuah a ni a, a zinnaah hian US president hian sumdawnna inremna eng emaw zat an siam chu sawi chhuak tawh mah se US leh Israel-in Iran an inbeihnaah hmasawnna lian a la awm lo.
Trump-a thu sawi hi Russian President Vladimir Putin-a’n China tlawh tura a thlen lai a ni bawk a, Washington hian an inkungkaihna hi duh lo mah se hun rei tak chhunga an inkawp tawhna siam that zel a tum a. Moscow hian kum tam tak chhung Iran hnenah ralthuam a pe tawh bawk.
White House ballroom sakna hmuna event neihnaah Trump-a chuan, “President Xi-a hian Iran hnenah ralthuam engmah a thawn dawn lo tih min tiam a, chu chu thutiam mawi tak a ni. A thu angin ka pawm a ni,” a ti.
Xi-a chuan Strait of Hormuz chu ‘keimah ang bawkin’ hawn a duh tih a sawi tih a sawi bawk.
Trump-a’n China a tlawh hma khan amah leh US thuneitu sangte chuan Beijing-in Iran chunga thuneihna a neih chu hmang tangkaiin inkahhai a awm theih nan a puih an beisei thu an sawi a, hetih rual hian indona hi Xi-a nena an inkawmnaa an thu chak tur lian a nih loh thu an sawi bawk.
An inkawm hnuah hian a hma pawha lo inrawlh lo tawh, China hi thuk zawkin indonaah hian a tel dawn tih lanna a la awm lo.
Trump-a hian Iran laka vauna thar a tihchhuah hnu lawkah Xi-a nena an inbiakna hi a sawi chhuak a, social media post-ah April 8 atanga indona chawlhsan mek chu titawp hlen turin ‘hun a liam zel’ tih a tar lang a ni.
Thawhtanni khan Trump-a chuan beihpui thlak thar leh tumnaah ‘nghah rih’ a nih thu a sawi a. Qatar, Saudi Arabia leh United Arab Emirates-te ngenna anga thutlukna siam a nih thu sawiin, “Tunah hian inbiakna pawimawh tak a awm mek a ni,” a ti.
Iran-a Tasnim News Agency pawhin Thawhtanni vek khan Iran chuan indona tihtawp nan point 14 awmna ruahmanna siam that a thehlut tih a tar lang a, a chipchiar erawh puan a ni lo.
Iran parliament-a national security committee hotu, Ebrahim Azizi-a chuan Trump hi inbe tura phur vang ni lovin, an chet leh chuan Iran chhan letna a hlauh vang zawk a nih thu a sawi ve thung.