Aizawl: Inrinni zing dar 7:30 khan Central YMA buatsaihin Vaivakawn-ah Ruihhlo Do Street Campaign neih a ni a. He hun hi Vaivakawn Branch YMA President PC Lalhuapzauva’n a kaihruai a, Central Executive Committee (CEC) member Ramsangliana’n thu a sawi.
Ramsangliana chuan ruihhlo chi hrang hrangin mihring nun, khawtlang nun leh chhungkua a tihchhiat nasat zia sawiin, ruihhlo do kawngah theihtawp chhuah tlang turin mipui a ngen a. Ruihhlo avanga chhungkuain tlakchhiatna an tawh nasat zia te, ruihhlo leina tur sum leh pai a ngaih hnem thin zia te leh ruihhlo ngai nei chhungkuaten rilru hahna leh hlim lohna rapthlak tak an hmachhawn thin zia a sawi a. Zan lama thalai tei vak nasa leh hlimna hmun hrang hrang zawng tharte hian ruihhlo an hnimhnaih phah hnai hle tih a sawi bawk.
Street Campaign-ah hian Central YMA General Secretary Prof. Malsawmliana leh CEC member-te bakah a chhehvel Branch YMA hruaitute an tel.
Central YMA chuan he Ruihhlo Do Street Campaign hi Aizawl khawpui chhung hmun 15-ah a lo buatsaih tawh a, May 30, 2026 hian Lengpui-ah neih leh an tum a ni.
He campaign hi mipuiin ruihhlo do a tul zia an hriat tharna leh infuih tharna hmun pawimawh tak a nih avangin Central YMA chuan a hlawk thlak hle tih an sawi a, a remchan dan angin chhunzawm zel an tum bawk a ni.