Aizawl: Mizoramin Rajya Sabha-a seat pakhat a neih luah tur thlanna chu June 18, 2026 khian neih a ni dawn tih Election Commission of India chuan a puang.
Election Commission thuchhuah danin, ram chhunga State 10-a Rajya Sabha seat 24 luahtu tur thlanna atan hian June 18 khian vote thlak a ni dawn a, heng State 10 zingah hian Mizoram chu a tel a ni.
Rajya Sabha member thlanna hi Mizoram bakah Andhra Pradesh, Gujarat, Karnataka, Rajasthan, Madhya Pradesh, Jharkhand, Manipur, Meghalaya leh Arunachal Pradesh-ah te neih a ni ang.
He inthlanna neih tur atan hian June 1 khian inthlan hriattirna tihchhuah a ni ang a, inthlan chuh tumte tan June 8, 2026 thlengin hming pekluh theih niin, hming pekluh te chu June 9-ah endik a ni ang a, June 11, 2026 thlengin inhnuhdawhna hun hawn a ni ang.
June 18, 2026 zing dar 9 atanga tlai dar 4 thleng vote thlakna hun hawn a ni ang a, hemi ni vek tlai dar 5-ah vote tla te hi chhiar nghal a ni ang.
Mizoram hian Rajya Sabha-ah seat pakhat nei mekin, tuna Rajya Sabha MP ni lai, K. Vanlalvena hun July 19, 2026 khian a tawp dawn a ni.