Synod Prison Ministry buatsaihin Inrinni khan Armed Veng Presbyterian Kohhran Hall-ah jail tang chhuak tawhte puala Pathian thua inpawl hona, Ex-Prison Inmates Follow-up Programme hman a ni a. He hun a hmanpuinaah Chief Minister Lalduhoma chuan sorkar hnathawk leh hnathawk kher lo, a changkang chinte Pathian thua an inchiahna tur hmun, Lungleng-ah Rs vbc 20 chuang sengin an buaipui mek tih a sawi.
Chief minister chuan Lunglenga hmalakna chungchang sawiin a nawlpui nena inpawlhsawp lo turin sorkar hnathawk, a changkang chin leh sorkar hnathawk kher lo, changkang china inngaiten Pathian thua an inchiahna tur an buaipui mek a, a bik takin chu chu an officer rualte tan a ngai tih sawiin, Rs vbc 20 chuang sengin an buaipui mek tih a sawi.
Chief minister chuan Mizoram chu ruihhloin a tihbuai nasat avangin indopui puan hial ngaia a hriat thu a sawi a. Chief minister-a lak luh a nih veleh pawh khan an in tlawh hmasa lovin ruihhlo ngaite enkawlna hmun, TBCC a tlawh nghal tih a sawi.
Sorkar thar hian ruihhlo do committee, kum thum lai lo thi tawh chu din tharin harsatna karah sum leh pai pawh an dah belh a. Tunah chuan ruihhlo a tlem tawh zawk avangin a man pawh a to ta viau a ni, a ti.
Sorkarin Central YMA nen tangduna an kalpui mek, ‘Operation Jeriko’ chungchang sawiin, Champhai lam chu an thian fai viau tawh tih leh tun hnaia Sakawrdai lama ruihhlo hlet chhuak leh mek pawh ngaihsak lehzual an tum thu a sawi bawk.
Jail tang chhuak tawhte dinhmun sawiin Lalduhoma chuan, “Jail atanga an chhuahin an dam a, rilru thar pu mah se tih tur mumal an neih loh avangin a ngaiah an let leh thin. Chuvang chuan kut themthiam thil lam leh an tui zawng kawhhmuh turin sorkarin hma a la mek a ni,” a ti.
Sethawn chu Synod nen thawkdunin an din thar dawn a, a enkawl chu kohhran kutah dahin sorkarin sumin a pui dawn tih a sawi a. Kohhran hrang hrangte nen pawh hmalak ho dan tur an indawr mek tih a sawi bawk.
Synod Prison Ministry hian Jail tang chhuak tawhten nun kawng dik an zawh zel theih nan kum 2023 atang khan Ex-Prison Inmates Follow-up Programme hi kum khatah vawi hnih an buatsaih thin a, tun hi a tum sarihna a ni.