Aizawl: MZP chuan sorkarin tourism director charge la tura R Lalrodingi a ruat chu mipui leh zirlai te zah lohnaah an ngaih avangin Thawhtanni zing dar 7:30 atang khan tourism department-a thawkte pisa kai an dang.
Commerce & Industries Addl. Director pension ta, R. Lalrodingi, tourism director atan a rawih nawnna order sut tura ngenna hmalakna kal zelah, tourism department-a thawkte pisa kai tur an dannaah hian boruak duhawm lo thleng a awm lo va. Tourism pisaa thawktute zingah pawh pisa kai tum an awm lo va. Tlai dar 4 khan call off phawt a ni.
He hmalakna kal zelah, tourism director hi a bang emaw, order hi sut anih loh chuan a hun leh a hmun ngaiah (Tourism Dept. kawt, zing dar 7:30-ah) punkhawm leh nise tiin MZP chuan an rel a ni.
MZP chuan Mizoram mipui thlawpna nasa tak an dawn avangin lawmthu an sawi a. College zirlai, hnampual hruaitu zawng zawngte he thil diklo tak dodalna hmunah hian lo tel leh vek turin MZP chuan a sawm nawn nghal bawk.