Aizawl: Mizoram Pradesh Congress Committee (MPCC) chuan Thawhtanni khan Congress Bhavan-ah Political Session an hmang a, thusawitu PAC member Joseph Lalhimpuia chuan Rs vbc 767 senga Tuirini Hydel Project chhunzawm a nih avangin ZPM sorkar lakah lawmthu a sawi.
Joseph Lalhimpuia chuan he project hi Congress sorkar bultan, kum 2018-a New Development Bank tanpuina hnuaia megawatt 24 pe chhuak thei tura ruahman a nih thu sawiin MNF sorkar khan kum 2020-a technical leh economic chhuanlam siama an titawp leh pawisa an pek kir hial kha state tana pawi a nih thu leh sorkar hmasain an hlamchhiah hnua ZPM sorkarin an chhunzawm leh chu Congress party chuan lawmawm an tih thu a sawi.
Congress hruaitu hian political party-te chu zirna hmanga politics khel tawh lo turin a ngen a. MNF sorkarin kum 2008 leh kum 2023 inthlan dawn hnaia vote hmuh nan chauha sum ruahmanna mumal awm lova sikul tam tak an upgrade thin chu zirna tichhetu a nih thu a sawi a; chutiang bawkin ZPM sorkar pawhin kum hnih chuang a khalh kual hnuah kum 2026-a ‘The Mizoram Education Lumpsum Grant in Aid for General Maintenance of Private School Rules 2025’ thar siama school 52 an provincialised-naa zirlai neih zat tehfunga an hmang chu khawpui chauh thlirna leh thingtlang tana hmahsawnna daltu a nih thu a sawi.
Joseph Lalhimpuia chuan tun hnaiah lecturer leh zirtirtu thahnemngaite transfer an nih bakah pension dawn hnai tawhte thleng chipchiar taka sawn kual an ni hian thawhhona boruak a tichhe hle tih sawiin, thalaite hma thlir atan quality education kalpui a nih laia MNF leh ZPM-in zirna hmanga politics an la khel reng chu sim tawh turin a ngen a ni.