Aizawl: North Eastern Council (NEC) chuan 15th Finance Commission (2022–2026) hun chhung khan SoNEC leh NESIDS-Roads programme kaltlangin Mizoram hmasawnna hna hrang hrang atan Rs vbc 339.06 chuang a hman thu an thuchhuahah an tar lang.
SoNEC programme hnuaiah NEC hian Rs vbc 123.83 sengin damdawi in, zirna in, bazar, infiamna hmun leh ranvulh enkawlna hmun hrang hrang a puih bakah, kuthnathawktute tan leilet, sangha dil, ranvulh leh thlai thar chhuahna kawngah nasa takin hma a la a, Mizo culture leh pi leh pute sulhnu humhalh nan hmasawnna ruhrel eng maw zat a din bawk.
NESIDS-Roads hnuaiah Rs vbc 277.99 zet hman niin road project paruk zinga pahnih chu zawh fel a ni tawh a, chung zingah chuan Act East Policy tichaktu Saiha-Lungbun-Tlangnuam-Haka kawngpui siam thatna leh April 2026-a sum Rs vbc 20.09 an release hmanga Pukzing–Silsury leh Tualpui–Champhai kawngpui siam hna te a tel a ni.
Hemi bakah hian April 2026 khan Sinlung Hills Council area-a harsa zawkte tan ranvulh tanpuina pein, West Phaileng-ah market building leh Champhai district-a Vangchhia tuihnar siam nan te sum a pechhuak bawk a, thalaite pualin Ashtalakshmi Youth Exchange hmangin January 2026 khan Andaman leh Lakshadweep zirlai 44-te’n Mizoram University an tlawh bakah, NE-SPARKS hmalakna kaltlangin Mizoram zirlai 99 zet chuan ISRO hmunpui an tlawh thei bawk a ni.