Aizawl: Central sorkar media unit hrang hrang leh Mizorama sorkar department thenkhatte thawhhona ‘Inter Media Publicity Coordination Committee’ (IMPCC) chu All India Radio (AIR) Conference Hall, Tuikhuahtlangah Thawhtanni khan an thukhawm.
Thutkhawmah hian Press Information Bureau (PIB), AIR, Doordarshan, Department of Information & Public Relations (DIPR) leh state media hrang hrangte tha zawka an thawhho dan tur sawiho a ni a. Central sorkar scheme chi hrang hrangte chu a hlawkpuitu tur (beneficiary) mipuite beng thleng ngei tura hriattirna (awareness) tha zawk siam dan tur leh, sorkar project hlawhtlinna chante mipuiin zau zawka an hriat theih dan turte an sawiho a ni.
Tunlai khawvel hmasawnnain a ken tel digital media leh social media platform (Facebook, Instagram, YouTube leh X) te kaltlanga thu thar thehdarh kawnga tan lak a pawimawhzia te sawiho niin, thu thar dik lo (misinformation) laka mipuite an chiai loh nan rang taka hma lak dan kawngte pawh an rel a ni.
Thutkhawm hi Doordarshan Kendra (DDK) Aizawl Director Nampibou Marinmai-a’n chairman niin a kaihruai a, PIB Guwahati Joint Director Pavni Gupta bakah central leh state sorkar department hrang hrang aiawhte an tel a ni.