Aizawl: Central YMA hruaitute leh Mizoram Kohhran Hruaitute Committee (MKHC) hruaitute chu Thawhlehni zing dar khan Central YMA Office-ah an inkawm a, Central YMA President R. Lalngheta’n a kaihruai.
Inkawmhonaah hian YMA-in ruihhlo do kum a puan mekah Kohhran nena tanlakho dan tur an sawiho a. Kohhran hrang hrang ten ruihhlo leh a kaihhnawih do kawngah theihtawp chhuahin hma la mek hlawm mah se, ruihhlo hian thalaite nun leh chhungkua a khawih nasat avangin uar leh zuala hmalak a tul thu an sawi a. He hmalakna tichak tur hian Central YMA hruaitute chuan Kohhran tinah thupui pakhat hmanga tawngtairual buatsaih turin an ngen a ni.
Kohhran tin ten lehkha pawimawh leh Baptisma Certificate an pek chhuah thinah fimkhur zawka kalpui a tul thu an sawiho bawk a, a bikin khua leh tui ni lote hnenah pek chhuah kawngah fimkhur viau turin Central YMA hruaitute hian an ngen bawk.
Mizoram chhunga Zohnahthlak chi peng hrang hrang chengte zingah chibil hmalakna a awm tawh loh nan, nikuma YMA onkhawmpui lian thurel bawhzuina pawh an sawiho a. Central YMA-in Kohhran tinte hnenah chibil zawnga hma la lo tura ngenna a lo siam tawh angin, he chibil hmalakna hi a reh theihna tura theihtawp chhuahpui turin Kohhran hruaitute hi an ngen nawn leh a ni.
An inkawmnaah hian MKHC aiawihin Chairman Rev. John Raldosanga (Synod Moderator) leh Office Bearer dang mi paruk an tel a, Central YMA aiawhin President leh a thawhpuite an tel bawk a ni.