Mizoram Public Service Commission (MPSC) chuan Thawhtanni khan thuchhuah siamin Law & Judicial Department hnuaia Jr. Grade of Mizoram Legal Service (Legal Officer) post ruak pahnih an lak tur chu a changtu department atanga hnuk let tura ngenna an dawn avangin advertisement lo tihchhuah tawh chu an sut.
MPSC chuan hna lak lak tur thu January 7, 2026 khan hriattirna an tichhuak a ni.
May 5, 2026 khan MPSC-in hriattirna tichhuakin hna diltu mi 115 zingah 112-te dilna hnawl a ni a, mi pathum dilna pawmsak an ni a. Diltu thenkhat sawi danin an dilna hi online veka theh luh tur a ni a, an dilna an hnawl chhan chu document an upload kim loh vang nia hrilh an nih thu an sawi a. Mahse, online-ah hemi document bik upload-na tur an hmu lo niin an sawi.
Diltu zinga pakhat sawi danin an dilna an hnawl chhan chu document upload naah hian ‘Others’ tih chauh a awm avangin eng ber nge upload tur tih a awm lo va, mi dang pathum tlingte hian BAR atanga kum thum chhung advocate practice certificate an upload vang a nih a rin thu a sawi.