Aizawl: Union Minister of State for Information & Broadcasting leh Parliamentary Affairs Dr. L. Murugan chuan Nilaini khan Kolasib khaw chhunga sorkar hmalakna hrang hrang, zirna in leh kuthnathawktute hmunhma a tlawh kual.
Union minister hian Regional Sports Training Centre (RSTC), Saidan tlawhin zirlaite football match a enpui a. Hemi hnu hian PM Government Model Primary School-I (PM SHRI) tlawh lehin kum 2047-a India hmasawnna tluantling neihna tura zirlaite pawimawhzia a sawipui a ni.
Dr. L. Murugan hian Diakkawn High School a tlawh bawk a, hetah hian NCC parade chibai chhangin, NEP hnuaia Vocational course naupangte an zirtir dan te a hmunah a enpui a ni.
Union Minister hian Audrene Scism Children’s Home (Khuangpuilam) leh Thingdawl ICDS Project hnuaia Anganwadi Centre (Vengthar) te tlawhin thawktute leh naupangte a kawm bawk.
Kolasib a chhuahsan hma hian union minister hian ICAR bultuma kalpui tur, leilung hrisel leh thlai hrisel enkawlna hmanrua ‘Khed Bachao Abhiyan’ a tlangzarh a. ICAR Conference Hall-ah mithiamte leh loneitute kawmin, thlai thar tam dan tunlai thiamna hman a tul thu a sawi a. ICAR mi thiamte buatsaih lehkhabu, ‘Weather based Agro – Advisories for Climate resilient Farming in Mizoram’ tih chu mipuia chhiar turin a tlangzarh nghal a ni.