Health Minister Lalrinpuii leh Power Minister F. Rodingliana ten Inrinni khan Mizorama damdawi in lian pahnih, Civil Hospital, Aizawl leh Falkawna Zoram Medical College & Hospital tlawhin chhum lo chat lova power supply pekna hnathawh tur leh hmalakna tur hmachhawp dangte an enfiah.
Civil Hospital, Aizawl chawmtu tur bik, dedicated power line siamna hnathawh bul tan dan tur minister-te hian an en a, ruahman dan chuan powerline hi direct-in Indoor Sub-Station atanga lak tur a ni a, Rs vbc 1 chuang ruahman a ni.
Power supply khaihlak thulha damdawi in pum chawm thei tur 500 kVA diesel generator dahna tur hmun enho nghal a ni a, generator leina tur hi P&E Department kutah pawisa pek tawh niin bun fel thuai tum a ni.
Hmun pawimawh zual – ICU, blood bank, Haemodialysis Unit leh operation theater te chawmtu tur power back up keng tel 20 kVA Solar Plant dahna turte an en nghal a ni.
ZMCH-a NESIDS (OTRI) atanga Rs vbc 13.14 hmuh tak senga 1.5 MW Solar Plant dahna tur leh heta tanga kawlphetha tharchhuahte ZMCH chhunga sem kualna tur km 1-a sei distribution line leh 500kVA distribution tranformer thar pathum dah belh dan turte minister pahnih hian an en bawk a. ZMCH-a solar plant dah tur 1.5 MW atang hian 1.2 MW hi On-Grid tur niin, .3 MW hi Hybrid Mode vuah tur a ni.
Minister-te hian damdawi in liante khaihlak lova 24X7 power pek turin heng ruahmannate hi siam a nih thu an sawi a. A bik takin hmun pawimawh zual – ICU, blood bank, Haemodialysis Unit leh operation theater te chu thlurbing zual a nih tur thu leh rei loteah hna thawh tan a nih tur thu an sawi.