Excise & Narcotics Minister Lalnghinglova Hmar hovin Thawhlehni chawhnu khan MINECO-a a office chamber-ah Excise & Narcotics Department, Home Department, Food & Drugs Administration (FDA) leh Central YMA aiawhte chuan tun hnaia thalai zinga khuh damdawi (Cough Syrup) ruih a hluar chho zel chungchang ngaihtuahin, ‘Ruihhlo Do Meeting’ an nei.
Excise Minister Lalnghinglova Hmar chuan thalai leh naupang zawkten zu leh damdawi dang an khawihna kailawn langsar tak chu khuh damdawi hi a nih thu sawiin, khawvel hmun dangah uluk taka an khuahkhirh laia Mizoramah a zalen em em mai hi thil nih dan tur a nih loh thu leh a ngaihmawhawm tak zet thu a sawi.
Thutkhawmah hian zirlai naupang atanga sakhaw rawngbawltu thlenga he thilin a nghawng chhiat tawh thu report ngaihthlak a ni a, tun dinhmuna khuh damdawi hluar dan leh chumi dona atana hman theih tur dan hrang hrang zirchiang tur hian Home, Excise, FDA leh Central YMA aiawhte telna Joint Team din nghal a ni.
Joint Team hmalakna leh zirchiannate hi thutkhawm leh hunah thlirho a ni ang a, hmalak chhunzawm dan ngaihtuah tur hian a rang lamah thutkhawm leh nise, chumi hunah chuan Social Welfare Department leh Mizoram Chemist & Druggist Association-te pawh koh tel ve nise tih a ni bawk.
Mipuite leh tlawmngai pawl hmalakna atangin Central YMA chuan damdawi zuarte hnenah doctor lehkha (prescription) tel lova khuh damdawi hralh lo turin ngenna an siam dawn a, YMA Branch hrang hrangte pawh an huamchhunga damdawi dawrte tlawha lo in-report tura ngen an ni bawk ang.