Aizawl: Mizoram State Cooperative Marketing and Consumers Federation Ltd. (MIZOFED) chuan kum 2025-2026 chhungin Mizoram hmun hrang hrangah tuialhthei hralhna atangin Rs nuai 1,274.78 a hlep.
Thawhlehni khan MIZOFED General Assembly vawi 28na chu Dawrpui Multipurppose Centre-ah neih a ni. He huna MIZOFED Managing Director Lalhruaituanga tar lan danin, POL a sumdawnna bikah kum 2025-26 chhungin Mizoram hmun hrang hranga MIZOFED Station 10 a tuialhthei hralhna atanga hlep (gross profit) chu Rs nuai 1,274.78 a ni a. Hemi hun chhung vek hian LPG a sumdawnnaah District paruka LPG Distributor atangin hlep Rs nuai 341.28 hmuh a ni a. Hei bakah hian ni tin mamawh essential commodities atangin hlep Rs nuai 181.41 hmuh a ni.
MIZOFED inkhawmpuia khuallian Cooperation Minister PC Vanlalruata chuan, MIZOFED hmasawnna hrang hrangte chu lawmawm a tih thu sawiin, thawktute hmalakna chu fakawm a tih thu sawi a. Society te chu sorkarin kawng hrang hranga Mizoram hmasawnna atana thawhpui a duh thu sawiin, sorkar flagship programme ‘Bana Kaih’ te pawh hmang tangkai turin a chah.
PC Vanlalruata chuan sorkar policy leh scheme te chu primary society te’n bawh lehzual tur leh a zar zo ngei se a duh thu sawiin, thawhhona tha tak neia Mizoram hmasawnna atana tan la zel turin a chah bawk.