Aizawl: Directorate of Enforcement (ED), Aizawl Sub-Zonal Office chuan ramri kaltlanga ruihhlo tawlhrukna leh sum dik lo inthup (money laundering) chhui zuiin, Thawhtanni khan Mizoram, Tripura leh West Bengal-a hmun li a rualin an dap a, hetah hian Champhai District Zokhawthar-a Hmingthansangi chenna in pawh a tel a ni.
He dapna hi kum 2025-a Narcotics Control Bureau (NCB), Agartala Zonal Unit-in NDPS Act hnuaia an lo ziahluh tawh tlawhchhana ED-in an chhui zui a ni. August 21, 2025 khan Mizoram chhunga NH-06A-ah methamphetamine kg 49.101 leh heroin gram 40 lo man tawh a ni a, hemi kaihhnawihah mi pariat lai man an ni tawh nghe nghe.
ED chhuina atanga a lan danin, he ruihhlo tawlhruknaah hian rampawn leh state hrang hrang inzawm khawm hotu bik an awm a. Ruihhlo hi Myanmar lama supplier-te hnen atanga lain, Champhai/Zokhawthar bial kaltlangin India ram chhungah an thawn lut a, Tripura lama dawngtu hnen an thlen thin a ni.
Ruihhlo hralhna sum hi hriat hran harsa turin Myanmar-a cheng, ramri hrula address hmangte bank account leh sumdawnna hming lem (shell entities) hrang hrang bakah, sum fai leh hawala hmangin an inpe tawn thin a. Tun thleng hian hetiang ruihhlo sum chevel hi Rs vbc 142 chuang lai ziahluh a ni tawh a ni.
He thubuai kaihhnawhihah hian ruihhlo lo petu ber Myanmar mi Chintuang @ Tluanga leh a phurtu hotu ber Jabrul Haque te chu NCB chuan an lo man tawh a. June 8, 2026-a dapna an neih zui takah hian huan leh ramngawa chetvelna thlirna turin Bangladesh ramri hrula thingkunga CCTV camera 25 chuang lai vuah man chhuah a ni a, ruihhlo zawn nan uisathiam (dog squad) hman niin BSF leh CRPF-te tanpuina lak a ni bawk.
Zokhawthar-a Hmingthansangi chenna in bakah hian, Tripura lama ruihhlo dawngtu ber nia hriat Anowar Hossain leh Jashim Mia te in leh, West Bengal-a sum chheprelhtu nia rinhlelh Chaitali Das (Proprietor, M/s Riju Enterprises, North 24 Parganas, West Bengal)-te hmun an dap a. Hmingthansangi bank account-ah hian rinhlelh thil sum Rs vbc 33 laia lut hmuh a ni.
ED chuan he dapna atang hian lehkha pawimawh, phone leh thil dang eng emaw zat an man zui nghal a, an la chhui zui mek zel a ni.