Aizawl: June 18-a Mizoram Rajya Sabha MP inthlan neih turah, rorel lai ZPM party candidate K. Laltluangkima chuan Thawhlehni khan fiahna hrang hrang paltlangin candidate document endikna (scrutiny) tluang takin a paltlang.
Thawhlehni chawhma dar 11 khan Mizoram Legislative Assembly pisa-ah he inthlana Returning Officer (RO) Zothansanga Ralte, Commissioner & Secretary hmaah scrutiny hi neih a ni a. He hunah hian Mizoram Chief Electoral Officer (CEO) ni lai, Election Observer Garima Gupta pawh a tel a ni.
ZPM thuchhuah chuan, an candidate hi an khingpui party ukil-ten kawng hrang hrangin rem leh rem lova hek thlak tumin hma laah an puh a, Thawhtanni tang khan harsatna siam tawh mah se, endiknaah hian RO hmaah ZPM Rajya Sabha MP candidate K Laltluangkima birth certificate leh passport thlenga pharhin, eng harsatna mah awm lovin endikna hi a paltlang ta niin an tar lang.
Tar lan tawh angin, Mizoram Rajya Sabha MP seat khat inthlan hi June 18, 2026 zing dar 9 atanga tlai dar 4 thleng Assembly House-ah neih a ni dawn a, hemi ni vek tlai dar 5-ah vote chhiar nghal a ni ang.
Tun dinhmunah hian MLA 40 awmna Mizoram Assembly-ah rorel lai ZPM hian MLA 27 an nei a, MNF-in 10, BJP-in pahnih leh Congress (INC)-in MLA pakhat an nei thung a ni.