India-a eptu pawl lian ber, Congress party chuan tuialhthei thlitfim loh man sang zawk a hmangtute tawrhtir aiin anmahniin tuar mai turin sorkar a ngen a, tuialhthei leh ni tin mamawh man sang chho zel chuan mamawhna a tichhe dawn a, eibara thatna pawh a tikhawtlai dawn niin a sawi.
Indona avanga Strait of Hormuz khar a nih hnua thlitfim loh tuialhthei man sang leh a phurhna a buai avangin khawvela a la lut tam ber leh hmangtu tam pathumna, India hi a nghawng na hle a, hei vang hian sorkar hnuaia hralhtute chuan petrol leh diesel man chu 8% velin an tisang tawh a. Sorkar chuan chhungkaw tinte tana eirawngbawlna gas man tlawma a pekna pawh (subsidy) a tihhniam bawk.
Sorkar hnathawh dan report phek 76-a chhah, ‘Promise vs Reality: Year 2 of Modi 3.0’ tih chu Thawhlehni khan Congress hian an tichhuak a. Pawisa hmanna tkem, mi mal investment tizat tlem, inrintawkna tlahniam leh hna nei lo pung nasa chuan Prime Minister Narendra Modi-a’n eibara ram dinhmun tha anga a sawi fo chu a tichhia niin an tar lang.
Congress hruaitu hlun leh central bank board member hlui, Rajeev Gowda chuan kum tam tak chhung tuialhthei thlitfim loh man tlahniamah sorkarin hlawkna a hmuh thu a sawi a, hei hi sorkar chuan a hmangtute hnena man tlawma hralh ai chuan chhiah tihsan leh hlep tam duhna a thlang zawk tih a sawi.
Tuna khawvel puma harsatna a awm mek lai hian phurrit chu sorkarin a hmangtutete kutah a hlan tur a ni lo tih a sawi.
“Khawngaihin hetiang hi chuan ti suh u. A rah thlum tak i lo ei rei tawh avangin thei kawr kha tak hi rei lo te chu ve ei rawh,” tiin sorkar chu a ti.
Union Oil Minister Hardeep Singh Puri-a chuan Thawhtanni khan sorkar hmalaknate sawi fiahin thla lehah chuan tuialhthei leh boruakalhthei man a tlalhniam a beisei thu a sawi a, Iran nena US-Israel indonain energy supply a tihbuai lai pawhin dah khawl a nei tha tawk niin a sawi bawk.
Gowda chuan tuialhthei leh ni tin mamawh man tihsan nawn leh chuan hmasawnna a tidanglam dawn tih a sawi.
Congress report chuan India chu kum hmasa lama palinaa a awm hnuah kum 2026 khan khawvela economy lian ber paruknaah a tla thla tih a tar lang bawk a, May thla khan dollar nena khaikhin chuan Indian rupee chu a hniam ber lai, Rs. 95-ah a tlahniam a ni.
Foreign portfolio investor-te chuan kum 2026 thla nga chhung khan India atangin Rs. tluklehdingawn sing 2.1 vel an la chhuak niin a sawi a, March thlaa tawp tangka kum liam taa thla tam zawkah chuan net foreign direct investment chu negative-ah a chang thung.
Gowda chuan investment chak lo chu sumdawngte zinga hlauhthawnna a awm vang a nih thu a sawi bawk.