Aizawl: BJP National Headquarters-in ram puma Prime Minister Narendra Modi tana tawngtaina hun hman tura ruahmanna chu BJP Mizoram State Office Bearers chuan an State President Dr. K. Beichhua, MLA kaihhruaiin, State President pisa-ah Prime Minister Narendra Modi puala tawngtai rualna hun an hmang.
Narendra Modi-a’n kum 12 lai mai India ram PM nihna chelh tawha, Prime Minister thlan tawh zinga a hna thawk rei ber record a siam thei leh hriselna tha tak nena hun a hmang thei chu lawmawm an tih thu BJP chuan an sawi.
He tawngtai rualnaah hian thupui pawimawh hrang hrang bakah Pathian hnenah dilsakna an nei a. Modi leh a kaihhruai NDA sorkar chu India ram mipuite thatna leh ram hmasawnna atan te, mi retheite chhawmdawlna kawnga an thawh zel theih nan te, sakhaw hrang hrang betute zalen taka an awm theih nan te leh ram hruaitute Pathianin dik taka a kaihhruai zel nan dilsak an ni a. Chutihrualin, India ram tana sorkar hmalakna thate avangin lawmthu sawina an nei bawk.
BJP Mizoram chuan Modi-a kaihhruaina hnuaiah India ramin hmasawnna nasa tak a hmu mek tih sawiin, sorkarin mipui tana hna a thawh chhunzawm zel theih nan tawngtaina a pawimawh hle tih an sawi a. Mizoram mipuite pawh ram hruaitute tana tawngtaisakna nei theuh turin an sawm nghal.