Aizawl: World Environment Day – 2026 denchhena June 5 atanga hmalakna kal zelah, Ningani khan AMC Corporator (Lead Facilitator) te chuan Aizawl bawlhhlawh paihna hmun, Solid Waste Management Center, Tuirial-ah thingphun hnatlang an nei.
He Tree Plantation Drive hi ‘Ek Ped Maa ke Naam’ programme initiative hnuaia hman a ni a, Aizawl Mayor H. Lalremtluanga, Corporator-te leh official-ten an telpui a ni.
He hunah hian Mayor H. Lalremtluanga chuan leilung chhe zel veng turin thing phun uar a tul thu a sawi a. Chutih rualin, Solid Waste Management Rule tharin a phut angin chhungkaw tinin bawlhhlawh chi li-a thliar hran thlap a ngaih thu sawiin, hei hi bawlhhlawh sawngbawl kawnga hna pawimawh hmasa ber a nih avangin tan la thar turin chhung tinte a ngen a; hemi atana hman tur Solid Waste Management Rules, 2026 bye-law pawh siam mek niin, peih fel thuai a ni dawn tih a sawi.
Aizawl Mayor chuan Tuirial bawlhhlawh paihna hmunah bawlhhlawh chipui hrang hrangte paih fin leh vek anga sawi thin chu thu dik lo a nih thu sawiin, a paihna hmun hrang mumal tak siama sawngbawl a nih thu a sawi a. Luangmuala ‘Material Recovery Facility’ siam mek peih fel a nih hunah phei chuan bawlhhlawh thliar hran kawngah nasa lehzuala tan lak a ngaih dawn thu a sawi bawk.
AMC chuan World Environment Day pual hian special meeting hial kovin hma a la a, ward tinah bawlhhlawh thliar hran campaign an nei tawh a; June ni 12, 2026 (Zirtawpni) hian Ward tina tihfai ngai hmun pakhat theuh thlang chhuakin hnatlangte an thawhchhuahpui dawn a ni.