Assam Regiment chuan Thawhtanni khan Vana Pa Hall, Aizawlah an din champha vawi 85-na an lawm a. He ni denchhen hian Thawhtanni zing khan War Memorial-ah ram tana nun hlantute hriat reng nan pangpar an dah a ni.
Vana Pa Hall-a inkhawm buatsaihah Assam Rifles DIG, Brigadier Pushpender Sorayan chuan khuallian niin a hmanpui a; Mizoram Ex-Servicemen League President, MLA Lt. Col. Clement Lalhmingthanga chuan khualzahawm niin a hmanpui bawk.
Khuallian chuan Assam Regiment-te duhsakna hlanin mipui rawng an bawlna kawngah theihtawp chhuah zel turin a chah a. Ram tana nunna hlantu pasalthate chu an hre reng thin a ni tih sawiin zahna chibai a buk a. Tuna sipai ni mekte pawh an hmingthat tawhnate chhawm nung zela ram hming titha zual tura thawk turin a sawm.
Khualzahawm Lt. Col. Clement Lalhmingthanga pawhin Mizoram mipuite thinlungah Assam Regiment chuan hmun a luah thuk hle a ni tih a sawi a. Tunah chuan Assam Rifles bakah Lunglei, Champhai leh Khawzawl-ah te Territorial Army Company-te a lo awm ta chu Mizoram tana hmasawnna a nih thu a sawi a. Ram tana nun hlantute zahna chibai bukin, Assam Regiment kal zelna turah duhsakna a hlan.
He hunah hian sipaite, sipai bang (veterans) leh sawm bik mi eng emaw zat an kalkhawm a ni.