Gary Neville-a chuan England team chu Harry Kane zara langsar nia a hriat thu sawiin an striker hi an ram squad-a world class player awm chhun a ni tih a sawi.
Kane hian season hman zawh takah Bayern Munich tana vawi 51 a inlannaah goal 61 thunin a vanglaia season tha ber a hmang a, hetiang taka a chet that avang hian football khawvela mi mal chawimawina ngaihhlut hlawh ber, Ballon d’Or dawng thei tura chhawp chhuah zingah a tel theih phah mek.
England head coach Thomas Tuchel-a’n tlar hmaah tlan chak chi a thlan zawk avangin inhnialna tam tak karah Cole Palmer leh Phil Foden te chu World Cup squad-ah a telh lo va. Neville-a ngaihdan chuan heng tlan chak deuhte hi Kane-a khelh dan phung nena inrem ber turte an ni.
ITV hmaah Sky Sports analyst Neville-a chuan England captain chungchang chu sawiin, “Kane hi player ropui tak a ni a. ‘England hian player thiam tak tak kan nei,’ tiin in sawi thin a; mahse, world class player tak tak chu pakhat chauh kan nei, chu chu Harry Kane hi a ni,” a ti.
“Thomas Tuchel-a squad thlan zawng zawng hi, a bik takin tlar hma lam hi Kane-a thlir chunga siam vek a ni a. Form fel loh zual bik lai a awm thei a; mahse, Phil Foden, Cole Palmer, Morgan Gibbs-White te an awm lo a, amah tlan peltu tur player an duh zawk a ni. Anthony Gordon, Marcus Rashford leh Morgan Rogers te hi amah tlan pel tura chak taka tlan thut thei player te an ni,” a ti bawk.
A sawi zelnaah, “He squad pum pui hi Kane-a chungchang a ni tawp mai. He tournament pum pui thui tak pawh hi ama kovah a innghat a. Mahse pressure maw? Chu chu a hre pha lo ang. Lungtum ang maia nghet a ni a, professional player-ah chuan a tluk tur an awm lo. Tournament-a lo kal England player dangte chu an khingpuiten an tibuai thei mai thei, Kane chu tuman an tibuai thei lo vang. Rangkachak tlang hlu tak a ni,” a ti.
England hi US, Canada leh Mexico-a World Cup khelh mekah Group L-ah awmin zanin (Ningani tuk) dar 01:30 hian Croatia an hmachhawn dawn a. Ghana leh Panama an hmachhawn zui leh bawk dawn a ni.