Aizawl: Department of Agriculture & Farmers’ Welfare hnuaia Mission Organic Mizoram (MOM) hmalakna kaltlangin, Thawhlehni khan Tlabung Turmeric Farmer Producer Company (FPC) Ltd. te organic aieng tharchhuah, Rs nuai 26.6 man hu chu Ch. Saprawnga Truck Terminal, Rangvamual atangin Adviser to Chief Minister Dr. KC Lalmalsawmzauva chuan Assam lama buyer-te hnen pan turin a vailiam.
Tlabung FPC hian MOVCD-NER Phase IV hnuaiah aieng ro (Dried Turmeric Finger) metric tonne 25 chu kg khatah Rs 106.4 zela hralhin, Rs nuai 26.6 an hmuchhuak a ni. He FPC-ah hian organic aieng chingtu member 500 an awm mek a ni.
Dr. KC Lalmalsawmzauva chuan MOM hmalakna chu lawmawm a tih thu sawiin, sorkarin thlai thlan bik market a hmuh theihna tura thil pawimawh ber chu chemical tel lo — Organic a nih thu leh Mizoram chu ‘Organic State’-a siam tumin hma lak mek a nih thu a sawi a. India sorkarin chemical tel lo ‘National Mission on Natural Farming’ atan budget-ah Rs vbc 750 lai a dah thu sawiin, Mizoram chu state dangte lakah chemical hman tlemna a nih avangin advantage tha tak a neih thu a sawi a, thlai chingtute chu chemical bansana organic farming lama kal turin a sawm.
“Sorkarin organic thlai chauh Support Price a pek hun a la awm mai theia, chutih huna kan buai loh nan chemical bansan a, ran ek leh bamboo/wood vinegar-te uar turin ka chah che u a ni,” a ti bawk.
Mizoramah MOVCD-NER hnuaiah hian Phase III zawhfel tawh niin Phase IV kalpui mek a ni a. Tun thlengin organic FPC 41 ziah luh a ni tawh a, heng hnuaiah hian organic farmer 27,604 an lo awm tawh a ni.