Aizawl: Aizawl Municipal Corporation (AMC) chuan AMC Conference Hall-ah Dawrpui Veng leh Chhinga Veng khawtlang hruaitute chu Nilaini khan kawmin ramri chungchanga buaina awm an sawiho a, ramri chungchanga veng pahnihte inkara buaina ching fel turin committee din a ni.
Veng pahnih atanga khawtlang hruaitu kal khawmte chuan committee-in hma a lakna piah lamah hmalakna dang awm tawh lo se tih chu an thutkhawmnaah hian an pawm.
Aizawl Mayor H. Lalremtluanga chuan inkawmna hun hi a kaihruai a, executive corporator leh official-te bakah veng pahnih aiawh local council leh NGO hruaitute an tel a ni.
Ramria buaina awm chu pawi a tih tak zet thu mayor chuan a sawi a, chin fel theih a nih a beisei thu sawiin buaina awm mek chu a fel thuai theih nan rilru zau tak pu turin veng aiawhte a ngen.
Khawtlang hruaitute chuan, “Vawiina veng aiawh kal khawmte hian Committee on the Land Dispute between Chhinga Veng & Dawrpui-in hma a lakna piah lamah hma lak rem kan ti lo a, hmalakna dang reng reng engmah a thlen loh nan hma kan la ang,” tiin resolution an siam.
Veng pahnih aiawhte chuan an ramri chungchanga buaina leh a kaihhnawih thil thleng dangte pawh sawi hoa ching fel turin lungrual takin Committee on Land Dispute between Chhinga Veng & Dawrpui Veng an din a, member tur pawh an ruat fel nghal.
Chairman : R. Lalawmpuii, Deputy Mayor, AMC
Vice Chairman : B. Lalawmpuii, Corporator, Ward No. 9
Secretary : K. Vanlalruata, Dy Municipal Commissioner
Member te:
Christina Roluahpuii Sailo, Executive Corporator
Vanlalhruaia, Executive Corporator
Vanlalfaka, Executive Corporator
K. Lalrodinga, Executive Corporator
Chairman & member pakhat, Local Council (Dawrpui & Chhinga Veng)
President & Secretary, YMA (Dawrpui & Chhinga Veng)
President & Secretary, MUP (Dawrpui & Chhinga Veng)
President & Secretary, MHIP (Dawrpui & Chhinga Veng)
R. Rosiama, Chhinga Veng (Prominent Citizen)
Vanlalbika, Dawrpui (Prominent Citizen)