Aizawl: World Donor Day pualin Nilaini khan thisen pe tha lawmman sem a ni a, thisen pe zingah kohhran thalaiten an thawh hlawk ber a, pawl ang chuan National Service Scheme (NSS) an thawhhlawk ber thung a. Kumin World Blood Donors Day thupui hi ‘One drop of humanity, give blood, save lives’ tih a ni.
World Blood Donor Day pualin thisen pe thate chawimawina hun hi Association for Voluntary Blood Donation (AVDB) leh Mizoram State Aids Control Society te chuan BSI Hall, Bible House, Khatla, Aizawl-ah an hmang a, lawmmante hi F. Kapsanga (L), Tuikual South te chhungkuain an tum a ni a, Overall Award hi ‘Pu K. Kapsanga Award’ tih hming pek a ni a. He hun hi Health Minister Lalrinpuii chu khuallian niin a hmanpui.
Lawmman semah hian kohhran huang, religious category-ah Aizawl district bikah Central Kristian |halai Pawl chu thisen pe hnem ber niin tum 93 Blood donation camp an huaihawt atangin thisen unit 4,069 an pe a. Aizawl Area TKP Co-ordination Committee chu pahnihna niin unit 982 an pe a, Territorial Salvation Army Youth chu pathumna an niin unit 599 an pe.
YMA category-ah Dawrpui Vengthar Branch-in an pe hnem ber a, tum hnih thisen an pe a, a vaia an pek hi unit 178 a ni a. Chanmari West Branch chuan dawtin camp tum hnih atangin unit 159 an pe a, Zotlang Branch chuan camp tum hnih atangin unit 87 an pe a ni.
College leh university huangah NSS Pachhunga University College chu pe hnem ber niin tum ruk camp atangin unit 946 an pe a, pahnihna NSS Unit, Govt Aizawl College chuan camp tum nga an neih atangin unit 823 an pe a, camp tum riat nei NSS Unit, Govt Hrangbana College chuan unit 653 an pe a, pathumna an ni.
Higher secondary school-ah NSS Unit, Synod HSS chuan camp tum khat neiin thisen unit 221 an pe a, NSS Unit, Helen Lowry HSS chuan camp tum hnih neiin unit 104 an pe a, pathumna NSS Unit, Govt. Republic HSS chuan camp tum hnih neiin unit 93 an pe a ni.
Miscellaneous Category-ah Ebenezer Medical Center chuan camp tum khat an huaihawtah unit 108 an pe a, Mizoram Gurkha Youth Association chuan camp tum hnih huaihawtin unit 91 an pe a, 34th Assam Rifles chuan unit 70 an pe.