Aizawl: Horticulture Minister C. Lalsawivunga chuan Nilaini khan Lammualah ni li chhung awh tur Horticulture Fair vawi 13-na a hawng.
Hawnna inkhawmah Minister Prof. Lalnilawma chuan Fair buatsaih a nih chhan ber chu kuthnathawktute’n an dehchhuah awmze neia an hralh chhuahna atana ni tiin, mipuite chu kuthnathawktute thil zawrh leisak turin a sawm a, ram leh hnam intodelh tur leh India rama lo neitu dangte chin loh organic thei ang bera ching turin thlai leh thei chingtute a fuih bakah, sorkarin sapthei hmanga pilot project kalpui a tum mek thu a sawi bawk.
Kum 2012 atanga neih tan, thei leh thlai chingtute leh a kaihhnawih tui mite puala June thlaa hman thin he Fair-ah hian kum 2025 thleng khan Rs 3,76,90,607 man hralh chhuah a lo ni tawh a ni.
Kumin Horticulture Fair hi June 17 atanga 20, 2026 thleng awh tura ruahman niin, stall 273 a awm a, he hun chhung hian bonsai leh greenhouse enkawl dan te, thlai venhimna damdawi leh bamboo vinegar hman dan te bakah pangpar khawi dan inzirtirna hrang hrang neih tura ruahman a ni bawk.