Aizawl: A hriselna dinhmun avanga ZPM president charge a lak loh hnuah, Ningani (June 18, 2026) atangin president dinhmun Lalliansawta’n a chelh tan leh dawn.
Nilaini khan Lalliansawta chuan office order tichhuakin, “Date 18.06.2026 (Thursday) atang hian Pathian khawngaihna a zarah president charge chu ka lo la let leh thei ta a, chutihrual erawh chuan meeting kaihhruai leh tul dangah a tul ang anga min pui chhunzawm turin Pu Lalduhoma, Leader, ZPM Legislature Party hi Ex-Officio EOB a nih angin ka ngen nghal bawk e,” a ti.
ZPM President Lalliansawta chu taksa lam harsatna avangin hun eng emaw chen a chawlh a ngaih dawn avangin president hian a chawlh chhung atan ZPM Legislature Party Leader Lalduhoma chu president mawhphurhna a pek angin, Lalduhoma hian April 22, 2026 atang khan khan ZPM president charge a la a ni.