Aizawl: Mizoramah petrol leh diesel (POL) man a san ber tum a nih tak avanga mipui phurrit chhawk zangkhai nan, sorkarin litre khat zela cess Rs 4 a lak mek chu June 2026 ral hma ngeia sut turin Mizoram Pradesh Congress Committee (MPCC) Action Committee chuan chief minister an ngen. An hun tiam chhunga sut a nih loh chuan mipui thlavang hauhin hma an lak chhunzawm zel tur thu sorkar an vaukhan nghal bawk.
MPCC-in Chief Minister hnena ngenna lehkha an thehluh tar lan danin, khawvel hmun hrang hrangah oil man a pun chhoh zel avangin India ram leh Mizoramah pawh petrol leh diesel man a sang namen lo hle a, hei hian mipui leh lirthei a eizawngte nasa takin a vawm rethei mek a ni.
Congress chuan, Mizoram sorkarin September 2024 atanga petrol leh diesel litres khat zela Social Infrastructure & Services Cess Rs 2 leh Road Maintenance Cess Rs 2, a vaiin Rs 4 a lak belh tak hi mipuite tana phurrit lehzual a nih thu an tar lang a. Sorkar hian VAT atang pawhin chhiah tam tak a la sa reng tih tar langin, hmanhmawh taka he cess lak belh mek hi titawp rih turin sorkar an phut a ni.
June 2026 ral hma ngeia sorkarin he dan hi a sut lo a nih chuan, MPCC chuan mipui rethei leh harsa zawkte thlavang hauhin turin hma a lak chhunzawm zel dawn tih an tar lang a ni.