Aizawl: Chief Minister Lalduhoma kaihhruaiin Ningani khan Mizoram Pro-Active Governance and Timely Implementation (Mi-PRAGATI) thutkhawm vawi thumna chu CM Conference Hall-ah neih niin, Sairang-Hmawngbuchhuah rel kawng ruahmanna thar an sawi ho.
Mi-PRAGATI hi Mizoram chhunga hmasawnna hnathawh lian zualte vil a, an harsatna tawhte chinfelsak thintu leh department hrang hrang thawhhona tichaktu tura din, sorkar hnathawh langtlang leh rang zawka kalpui zel dan ngaihtuahtu a ni.
Thutkhawma thil lian tham deuh sawiho zingah Rs. vbc 44,800 senga thawh tur Sairang – Hmawngbuchhuah rel kawng ruahmanna Railways lamin an sawifiah a. He rel kawng hi a thui zawng km 224 vela duan niin, station 20 a awm dawn a ni.
A hmaa Thenzawl Rel Station awmna tura ruahman chu khawchhung atanga a hlat deuh avangin Chief Minister hian hnai deuh zawka dah dan zawng turin a lo hrilh tawh chu, thutkhawmah hian Railways lam hian khawchhung hnaih zawka dah an tum dan ruahmanna thar an tar lang a ni.
Thutkhawmah hian NABARD RIDF sum hmanga Mizoram sorkar hnathawh mek, cheng vbc 3 aia tam chin, project 53-te chu chipchiar taka ennawn a ni a. Hna kal muang zualte a chhan tar lan niin, chak zawka hma lak chhunzawm dan turte an sawiho nghal a ni.
Ropuiliani Tribal Freedom Fighter Museum sak mek, State Tribal Institute sak mek, PM SHRI hmalakna, Swachh Bharat hmalakna, Kaladan Multi Modal Transit Transport Project, PWD hnuaia hna lian zualte leh a kalpui lai enzui ngai project hrang hrangte pawh an sawiho a, a harsatna hrang hrang chinfel dan tur an ngaihtuah nghal bawk.
Thutkhawmah hian Home Minister K. Sapdanga, EF & CC Minister Lalthansanga, FCS & CA Minister B. Lalchhanzova, PHE Minister Prof. Lalnilawma bakah Chief Secretary Khilli Ram Meena leh official pawimawh te an tel a. District hrang hrang Bawrhsap te, Ministry of External Affairs aiawh te, leh NHIDCL Managing Director te chuan online-in he thutkhawm hi an zawm a ni.