Aizawl: Mizoram tana lei tha (fertilizer) quota, tun hmaa dan lova Myanmar lama thawn chhuah thin chu kalphung thar sorkar chuan zaa 98 velin a titawp tawh tih Agriculture & Cooperation Minister P.C. Vanlalruata chuan a sawi.
Ningania Vanapa Hall-a Mizoram State Cooperative Union (MSCU) Annual General Assembly vawi 37-na a hmanpuinaah Minister chuan he thu hi a sawi a. P.C. Vanlalruata chuan tun hmaa mi mal sumdawnna atana leitha hman thin chu tihtawpin, tunah chuan MAHFED hnuaiah kalpui a ni tawh tih a sawi a. Lo neituten leitha an duh hun apianga man tlawm zawk leh awlsam zawka an lei theihna turin sorkar chuan ruahmanna chak takin a siam mek tih a sawi bawk.
P.C. Vanlalruata chuan Cooperative Society-te chu state economy tithang theitu an nih thu sawiin, Mizoram Cooperative Joint Mission hnuaiah hlawkna tel thei ‘profit-making cooperative society’ 1,000 din tura proposal, Rs vbc 303 hu Ministry of Cooperation-ah an thehluh tawh thu a sawi a. Society tinin kum khatah Rs. vbc 1 tal turnover an neih a, member-te lakluh 100% a tihpun an beisei thu a sawi.
Minister chuan ‘White Revolution 2.0’ hnuaiah bawnghnute tharchhuah tihpun nan sorkarin MULCO leh NDDB te MoU a signpui tawh tih sawiin, Rs vbc 24.10 senga MULCO tihchangtlunna hnuaiah kum thum chhunga bawngpui tha 1,000 lakluh a, bawnghnute litre 15,000 chuanga tihpun an tum thu a sawi a. Silk hmasawnna atan Silk Samagra 2.0 hnuaiah Rs vbc 5 approve a nih tawh bakah, Sericulture Post-processing Hub atan Rs vbc 125 ruahmanna an thehluh tawh thu a sawi bawk.
Inkhawma khualzahawm, Cooperation Commissioner & Secretary Udit Prakash Rai chuan Mizoram Cooperative Apex Bank (MCAB)-in ‘Scheduled Bank’ status a hmu ta chu mellung pawimawh tak a nih thu sawiin, kum 2047-ah chuan Mizoram GDP-a 10% hi cooperative society-te thawhchhuah a nih an beisei thu a sawi.