Aizawl: Aizawl Municipal Corporation (AMC) chuan khawpui chhung himna ngaihtuahna hmanrua atan kumin July 1 atanga October 31, 2026 chhung hian AMC huam chhin khawpui hmun hrang hrangah lei laih, leivung hmanga khuar hnawh leh a kaihhnawih hna reng reng thawh a khap.
He thupek hi ‘The AMC (Site Development & Slope Modification) Regulations, 2017′ in thuneihna a pek angin fur ruahtui tam laia hmunhma siamremna tura leilaih thlen thin chhiatna laka mipui an him theihna tura siam a ni. He khapna thupek bawhchhiate chu Mizoram Municipalities Act, 2007 tlawhchhanin Section 137, 374 leh 386-na hmangin hrem theih an ni ang.
He khapna kenkawh chhung hian chhiatna lian zawk a thlen lohna tura tul bik thil a awm a nih chuan phalna hranpa dil theih a ni ang a. Hetiang tul bik thil neite chuan an hmunhma dinhmun chiang taka tar langin AMC-ah dilna an thehlut thei thung dawn a ni. Mahse, heng dilnate hi a hmunah uluk taka enfiah tur a nih bakah, dilna thehlut apiang phalsak ngei ngei tur tihna a ni lo thung.
Khapna thupek chhuah a nih lai hian thlan laih te, chhiatna thleng avanga leimin senghawi leh thenfai tula chet lakna te, leh tul bik thil avanga phalna bik pek tawhte hna erawh chu he lei laih khapna hian a huam lo vang.