Pakistan hmarthlanga kawngpuia bomb kam vawi hnih puakah mi pasarih an thi.
Inrinnia bomb puak hmasa zawk hian lirthei a fuh a, a pahnihna hi chhanchhuaktuten an an buaipui laiin a puak leh niin police-te chuan an sawi.
Afghanistan ramri, Khyber Pakhtunkhwa province-a Bannu district-a police officer Yasir Afridi chuan, “Mi mal pick-up truck, passenger phur chu hmun kilkhawr takah remote hmanga thunun IED-a beih a ni,” a ti a, hei hi tualchher bomb a sawina a ni.
“Hliam tuarte hi hmanhmawh taka car-a damdawi in panpui an nih laiin a pahnihna a puak leh a ni,” a ti a, mi pathumin hliam an tuar tih a sawi bawk.
Prime Minister Muhammad Shehbaz Sharif-a chuan he pawikhawihna thleng hi a dem thu sawiin, sorkar chuan mawhphurtute chu hremna a pe dawn tih a sawi.
Bomb puak hi a titua inchhal an la awm lo va; mahse, Pakistan Taliban, TTP tia hriat leh ralthuam keng pawl dangte chu he hmunah hian an che nasa thin.
Pakistan chuan ramri bula beihpui thlakna a pun zel avangin Afghanistan chu mawhphurtuah a puh a, Kabul-a Taliban sorkarna ram chuan Islamabad-in an rama ralthuam kengte zalen taka awm thin anga a puhna chu vawi tam tak a hnial tawh.
Tun hnai thla eng emaw zat chhunga an inlaichinna chhe tak karah buaina a chhuak a, Pakistan-in Afghanistan khawpuite chu thlawhna hmangin a bei bawk.
Pakistani sorkar chuan tun thla chhung khan ramri bulah thlawhna hmangin Taliban fighter 26 an thi niin a sawi a, Afghan sorkar chuan civil mi 12 an thi tih a sawi bawk.
October thlaa tharum thawhna a chhuah hnuah ramri hi a tam zawk khar a ni a, an insumdawn tawnna a titawp a, mipui leh bungraw lakna a buai bawk.