Aizawl: Central Anti Drugs Squad (CADS), Excise & Narcotics Department leh Assam Rifles tangkawp chuan Thawhlehni khan Aizawl hmun hnihah ruihhlo, Heroin (No. 4) tam tham tak an man.
CADS-te hnuchhuina kal zela a lan danin, ruihhlote hi Aizawl khawpui chhung hmun hnihah — Bawngkawn Shalom Veng-ah CADS-te hian Lalvunga (41), s/o Thanzuala (L), Mualkawi khua a cheng nia insawi hnen atangin Heroin hawng thum an man a.
Tuikual North-ah Zaithantluangi (43) leh Lalhriatpuii (53) te bakah, hmeichhe naupang kum tling lo pakhat hnen atangin Heroin hawng nga an man bawk.
Thudawn danin, Tuikual North-a Heroin hawng nga an man takte hi Khawmawi (Myanmar)-a cheng, ‘May-i’ (Instagram bika mayibaby8 tia hriat) ta a ni a. He hmeichhia hian Mizoram atangin naupang kum tling lote chu an khaw dawra thawk tur anga sawmin a thlemchhuak a ni.
Naupang kum tling lote chu an jail an tang rei thei lo tih chhuanlama hmangin, ruihhlo keng kualtu hmanrua atan hlawh neia a tirh thin thu sawi a ni a. Hetianga May-i mi tirh naupang kum tling lo hi vawi eng emaw zat man an lo ni tawh nia hriat a ni bawk.
Heng ruihhlo man chhuah tak te dan ang zelin thubuai an ziaklut nghal a ni.