Aizawl: National Health Mission, Health & Family Welfare Department buatsaih ‘State Felicitation of Kayakalp Awardees Mizoram (2025-2026)’ chu Nilaini khan BSI Hall, Bible House, Khatlah hman a ni a. He hun hi Health Minister Lalrinpuii chuan khuallian niin a hmanpui.
Minister chuan India ram puma faina ngaihpawimawhna ‘Swachh Bharat Campaign’ hnuaia Kayakalp Scheme kalpui a nih thu sawiin, Mizoram chhunga Sub-Centre atanga PHC leh District Hospital thlenga damdawi inte an fai leh an thianghlim hle chu thawktute inpekna leh thawhhona thau vang a nih thu a sawi a, faina lawmman dawngtute a lawmpui tih a sawi.
Lalrinpuii chuan faina kalpuinaah hian pawnlam faina chauh piah lamah, natna inkaichhawn hrik venna, damlote himna, leh feltai taka enkawlna ngaihpawimawh zual a tul thu a sawi bawk.
Kayakalp leh NQAS laimu ber chu hawihhawmna a nih thu sawiin Minister chuan, “Ka chah duh ber chu damlo ten damdawi in an rawn panin hawihhawm leh rang taka lo buaipui zung zung tur leh enkawlna dik an mamawh ngei an dawn theihna tura hmalak hi a ni,” tiin damdawi in thawktute a chah. Thutkhawmah hian Vice Chairman Haukhuma Hauzel, IAS (Rtd) bakah Health Minister Lalrinpuii leh P&E Minister F. Rodingliana leh member dangte an tel a ni.