Aizawl: Directorate of Health Services, MINECO-ah National Immunisation Day 2026 Pulse Polio Programme chu Health & Family Welfare Minister Lalrinpuii’n Nilaini khan a hawng.
Minister chuan CMO, SNO, director-te, senior officer-te leh primary leh sub-centre enkawltute thawh that vanga vawiin thleng thei an ni chu lawmawm a tih thu a sawi a. India chu kum 2014 atang khan polio-free a lo puan tawh thu leh Mizoramah pawh vaccine lak nachang an hriat tawhzia leh ngaih pawimawhzia sawiin, “‘Polio free state’ kan nih reng theihna turin tan lak zel a pawimawh,” a ti.
Prime minister-in a tlangzarh tawh HPV vaccine pek thatna kawngah Mizoram chu India-ah pathumna a nih thu a sawi a, hemi kawngah hian tan la zuala pakhatna ni ngei thei turin kalkhawmte a fuih nghal.
Minister chuan Mizoram mipui zat chu nuai 16 vel chauh a nih avangin healthcare hi tha takin an kalpui thei tih sawi sawiin, “Mipui pawhin sorkar an beiseina a sang hle,” a ti.
He hunah hian Health & Family Welfare Department Addl. Secretary Lalnunmawii Ralte chuan polio chu naupangte tizeng thei natna a ni a, tui leh ei leh in bawlhhlawh atanga kai darh theih a nih thu a sawi a. Kum nga hnuai lam zawng zawngte chu National leh Sub-National Immunization Day-ah te polio drop pek thin an ni tih a sawi.
Polio hi India bikah kum 2011 kha hmuh hnuhnun ber ni tawh mah se thenawm ramah a la len avangin inven a la ngai a. June 28 hi National Immunisation Day (Pulse Polio Day) atan hman thin niin kuminah hian Mizoram district 11-ah hman a ni a. Kumina target chu naupang 102,830 niin, an puala immunization booth 1,430 neih a ni.
Hawnnah hian naupang 19 hnenah vaccine drop hi pek nghal an ni.