Aizawl: PHE Minister Prof. Lalnilawma leh Embassy of Israel, MASHAV – Israel’s Agency for International Development Cooperation-a Senior Water Resources Specialist Neeraj Gahlawat ten Mizoramah tui thianghlim zawk mipui hnena pek theih dan tur te, tui hman hnu tihthianghlim dan tur te, tuihna humhalh leh siam belh dan kawngte bakah environment humhalhnaa thawhho dan tur an sawi dun.
Thawhlehnia Mizoram House, New Delhi-ah an inkawmnaah minister chuan Mizoram dinhmun hriatchian nan MASHAV hotute chu tlawha zirchiang turin a sawm a, a taka thawhho theih dan kawng zawna hmalak vat a tul thu a sawi.
India leh Israel thawhhona, MASHAV hnuaia Embassy of Israel leh Mizoram sorkar inkara water sector-a thawhhona tihchak zêl dân tur leh hmalâkna tûrte ngaihtuah a ni a. Embassy chuan an ramin tui enkawlna hmanraw thar leh hmasawnna hmanga India leh state sorkarte nena thawhhona a kalpui mek angin Mizoram nen pawh thawhhona neih tum a nih thu an sawi a ni.
Israeli embassy chuan Aizawla tui thianghlim lakna hmun, chhan hrang hrang avanga chhe mekte thlang chhuak turin a ti a. Thlan chhuah hnuah Israeli thiamna leh hmanraw thar hmangin a hmunhma siam that leh humhalh dan turte enfiah a ni ang a, hnathawh theih dan tur leh sum awm dan azirin pilot project te, zirtirna leh sum hnar zawnna thlenga thawh ho zui theih dan tur kawng zawn a nih tur thu an sawi bawk.
Minister hi New Delhi Mizoram House-a Additional Resident Commissioner Alexander V. Chongthu leh Mizoram sorkara Additional Secretary V. Lalengmawia ten an tawiawm a ni.