Aizawl: IPRP&S Minister B Lalchhanzova chuan I&PR Conference Hall, Lianchhiari Run-ah Ningani khan Press Information Bureau (PIB), Ministry of Information & Broadcasting, Government of India buatsaihin Inter-Media Publicity Coordination Commitee (IMPCC) Meeting a hmanpui.
B Lalchhanzova chuan tun laiah information a darh chak tawh avangin information dik lo laka inven nan thawhona mumal tak neih a pawimawh a; chuvangin, IMPCC chu sorkar laipui leh state sorkar nena thawkhoin mipuite hnena thu dik pek chhuah kawngah a pawimawh tih a sawi.
Media-te chu sorkar policy leh scheme hrang hrang Mizo tawnga lehlin te, an platform-ah kuthnathawktute tilang tam tur leh information chu mi zawng zawng huapzo a nih tur thu a sawi.
Minister chuan saptawnga thu chhuah thin media-te chu Mizoram tourism than nasatzia tar lang tam turin a chah a. Aizawl chu traffic dan leh dun ngai pawimawh thin khawpui a nihna te, honking free leh silent city a nihna te, khualzin hmeichhia te tana hmun him ber pawl a nihna te tar lang tam turin a chah.
Mizoram chu Winter Capital of India atana hmun duhawm a nih thu leh Indian Tourism Development Council (ITDC) leh Central YMA nena thawkhoa ‘Tribal Homestay’ a kalpui chu puang nasa turin media te chu a fuih bawk.
DDK (News) Mizoram Director, IMPCC Chairman ni bawk, Nampibou Miranmai, IIS pawhin thu sawiin IMPCC chu media-te leh sorkar department-te thawhona a ni a, IMPCC hmang hian mipuite hnena thu thar pekah media-te chu thawhhona tha an neih a beisei tih a sawi.
IMPCC hi information & broadcasting ministry-in a din a ni a, state tina media nen thawkhoin sorkar department hnathawhte mipui hnena puan chhuah kawngah hna a thawk thin.
Meeting hi kumina a vawi hnihna a ni a, June khan AIR Conference Hall-ah neih tawh niin August hian neih leh tum a ni.
Ningania meeting-ah hian Mizo tawng bakah English leh Hindi-a thu chhuah tam te, Mizote GST inhrilhriat tam te, ruihtheihthil that lohna hawi zawng information pek chhuah tam te sawiho a ni.
Meeting-ah hian DDK, AIR, I&PR SPMU IOCL, National Tobacco Control Programme, MSME, CGST, FCI, Census Operation hotute an tel a. I&PR Joint Director Mina Zoliani Joute-in a kaihruai a ni.