Mizoram sorkarin tun hnaiah Mizo Taxi Application a siam thar leh hman mek chungchangah Mizoram Pradesh Congress Committee (MPCC) chuan transport minister leh app siamtute inkarah puanhnuai thil a awmin a hria.
Ningania thuchhuah an siamah sorkar hian taxi leh autorickshaw khalhtute zawm ngei tura a hriattir bakah an zawm duh lo a nih chuan taxi permit a pek chhuah belh tura tia taxi leh two Wheeler taxi khalhtute a vau chu hriatthiam harsa an tih thu an sawi a, app hman a nihna chungchang hi ennawn leh hram turin a ngen.
“Congress party chuan ngun taka a zirchian hnuaah he Mizo Taxi App hman tura thupek chhuah chungchangah transport minister leh app siamtute inkarah puanhnuai thil a awm ngeiin a hria,” tih sawiin mi mal hlawkna tura taxi leh autorickshaw khalhtute eizawnna tichhe thei application chu hmang lui lo turin Mizoram sorkar chu a hriattir tih an sawi.
Application hman a nih tur chungchangah State Transport Authority (STA)-in quatation leh tender chhuah miah lova firm tharlam tak, sulhnu leh tawnhriat la nei miah lova MoU a sign-pui chu dan bawhchhiatna a nih thu sawiin mipui pawisa eirukna atana kawngka zau tak hawnna niin a hria tih an tar lang.
App hmangtute atanga chhiah (GST) lak telna tur a nih avangin assembly house-a MLA-te rel tur emaw, cabinet-in a rel tur a nih laia chutiang awm lova STA-in an thuneihna bakah hma an la niin an sawi a, hei hi ram dan zah lohna leh mi mal hlawkna tura uchuak taka induhsaknaah a ngai tih an sawi.