Aizawl: Tuikual North MHIP-in Thawhtannia MHIP Day vawi 52-na lawmna chu Tuikual North YMA Hall-ah bialtu MLA Lalnghinglova Hmar-in a hmanpui.
Minister ni bawk hian MHIP-te chu mi dangte tana an inpekna leh chhiat ni that nia an inbuaipui dante chu fakawm a ti a, Mizote tan nu dinhmun chu a pawimawh a, nu tha tak leh fate tana nu nih tling tak hmeichhia an pun zel a duhsak thu a sawi.
Mizoramah mipa thalai thi an tam lutuk chu pawi a tih thu leh hemi kawnga hma la turin MHIP, YMA leh kohhran khawtlang tanho a ngaihzia a sawi a. Ram leh hnam dinchhuahna atan chuan chhungkuaa inenkawlna a pawimawhzia sawiin Lalnghinglova Hmar chuan nute chu an pawimawh a, zirna kawnga fate hawitir turin a fuih a. Zirna sikulah pawh sorkar sikulte chu an duai bik lohzia leh an that tawkzia a sawi a, high sikul atang mai ni lo, primary sikul atang an fate chu sorkar sikula dah uar turin kalkhawmte chu a chah bawk.
MHIP Day lawmnaah hian Tuikual North MHIP President Rita Lalparpuii chuan a kaihruai a. Kum 2025-26 chhunga an member thi mi 14-te sunna hun neih niin Tuikual North tihmingthatu leh life member-te chawimawina hun neih a ni a; Hmeithai Association leh Police Welfare Association te chuan thu an sawi a, Tuikual North MHIP Vice-President Lalthachungnungi’n lawmthu sawinain he inkhawm hi a khar a ni.