Aizawl: Diakkawn YMA Hall-ah Mizo Hmeichhe Insuihkhawm Pawl (MHIP) Diakkawn Branch, Kolasib chuan Thawhtanni khan an din champha phak kum 50-na, Golden Jubilee an lawm a, Mizoram Legislative Assembly Deputy Speaker Lalfamkima’n a hmanpui.
Jubilee lawmnaah hian khuallian, Lalfamkima chuan MHIP-in hun rei tak chhung hmeichhe dikna leh chanvo humhalh kawngah leh an dinhmun chawi kang turin hma a la nasa a, “Khawtlang leh ram pumah hmeichhiate chu mi zahawm leh thiltithei an nihzia a lantir reng a ni,” a ti.
An hmalakna leh inzirtirna zarah hmeichhiate hi mahni inringtawk takin an chhuak a, chhungkaw chhungah chauh ni lovin sorkar hna pawimawh leh kaihhruaina hnaahte thlengin an inrawlh nasa ta a, ram hmasawnna kawngah thawhhlawk tak an ni ta tih hi a lang chiang tih a sawi.
Fate enkawlna leh zu leh ruihhlo dona kawngah nute chu khawtlang leh chhungkuaah an pawimawh em em thu a sawi a. “Fate nunphung siamtu leh an tana entawn tur hmasa ber an nih avangin nuten an fate chu nun tha leh dik zawkah an kaihruai nasa hle a ni,” a ti.
Zu leh ruihhlo avanga chhungkua keh chhe tur leh thalai tam tak nun chhiatna lakah nute chu venhimna banpui pawimawh tak an ni tih a sawi a. An fate leh an hmangaihte chu ruihhlo laka fihlim turin thu tha hrilhin zilhna an pe a, khawtlang himna kawngah pawh nute hi rintlak leh pawimawh tak an ni tih a sawi.
MHIP-in hmeichhiate dinhmun chawikang tura hma a lakna bakah mipa leh hmeichhia inthliar hrang lova inhuam taka hmasawnna kalpui chu khawtlang hrisel zawk siam nan a pawimawh hle tih a sawi.
Inkhawm chawhma hun hi Sanghmingthangi, President, MHIP Diakkawn Branch-in a kaihruai a. An member thite sunna hun an hmang a, Golden Jubilee Zaipawl an zai a, Diakkawn VC leh YMA aiawhten thu abn sawi a, District Legal Services Authority (DLSA), Kolasib atangin dan zirtirna hun hman a ni bawk.
Jubilee lawmna pual hian tlaiah ruai an theh nghal bawk.