Mizo Hmeichhe Insuihkhawm Pawl (MHIP) day kan hmang zo a, mizote hmeichhiate hi an lo duai lohzia a hriat thar leh thin.
Kawng hrang hrangin mipate min khum chho zel a, a mihring tam lamah pawh mipate aiin an tam bawk.
An puala ni bik siam pawh hi an phu hle in a lang a, hmasawnna kawng hrang hrangah an hlawhtlinna hi fak tlak a tling.
Nakinah lawkah chuan kan ram hi hmeichhiate rorelna la niin, office leh ram hruaitu hna thlengin an la ther fur lovang tih a sawi theih loh.
Heti tak maia mizo hmeichhiate hmasawnna leh hnathawh rah tha hrang hrang kan hmu thei hi kan nihlawh a, a mipa lam zawk hi kan inenfiah a ngai hle.
Hmeichhiate ropuina hi sang zel se la, mipate pawh hmeichhiate tluk tura kan tan nasat a, kan ram min run mektu ruihhlo leh a kaihhnawih ti lo tura kan fihlim chhoh zel a tul e.
Hetih lai hian nu tha chuan fa tha a hring thin an tih angin hmeichhia la nula leh nu ni chho tan mekte pawhin kan fate kawng dika an kal theih nan nasa zawka tan an lak sauh sauh zel a tul bawk. Hmeichhe tha awmna inchhung chu chhungkaw nuam a ni thin tih hi hrereng chungin, hma sawn chhoh tum zel bawk teh se.