David Beckham leh Victoria Beckham te chuan an inneih kum 27-na lawmin, an thlalak hlui tak takte an tarchhuak nasa hle a, vawiin thlenga inpawh taka an la awm theih chhan chu an inkungkaihna a ngheh vang niin an sawi.
Kum 51 mi David chuan kum 29 zet kan awm dun tawh a, kan inneihna pawh kum 27-na a ni ve ta. Hemi chhunga vawiin kan thlen theihna chhan chu chhungkua kan dah pawimawh thin vang a ni, a ti a. Hei hi a nupui Victoria pawhin dik a tih thu a lo nemnghet ve bawk.
Victoria chuan kum 27 kan inneih chhung hian fa tha tak tak pekin kan awm a, malsawmna chhiarsen loh kan chungah a lo thleng a, kan intawn tantirh lai ang khan David hi ka la hmangaih reng, a ti.
David leh Victoria te hi an inneih cham kum 27-na ni mahse, an inneih hma hian sapho tihdan phung pangngai angin kum hnih chhung an lo chengdun lawk tawh a, hengte nen vek hi chuan kum 29 an lo awmdun tawh a ni.
An pahnih hian fa pali – Brooklyn Peltz Beckham,27, Romeo Beckham,23, Cruz Beckham,21 leh fanu Harper Beckham,14 te an nei.