Sri Lanka khawthlang lam lung in pakhata buaina chhuakah hian mi 26 an thi a, an zinga pasarih chu vengtu (guard) an ni a, mi 100 chuangin hliam an tuar bawk.
Colombo hmar lama tuipui kama Negombo Prison-a ni hnih chhung tharum thawhna thleng hi tang pawl pahnih inkara buaina chhuak atanga intan a ni.
Pathianni khan tangte hian guard-te silai an chhuhsak nia sawi a ni a. Hemi ni chuan mi pahnih an thi a, mi tam takin hliam an tuar bawk a. A hnuah tang mipa pawl hrang hrang leh a kianga unit pakhata hmeichhiate chuan chhuah phutin jail chungah an lawn ta a ni.
Thawhtanni khan tharum thawhna thar a chhuak a, tangte chuan jail kawngkharte tihchhiat tumin an bei a. Venhim hna thawktute dah a ni a, a chhungah hian silai vawi tam tak a ri.
Tharum thawhna hi tang pakhatin an tanna chhungah ruihhlo tawlhruk a ni tih a sawi chhuak atanga intan nia sawi a ni.
Prison officer 23 leh tang 54-te enkawl mek an la ni tih thuneituten an sawi.
Hliam tuar thenkhat chu Negombo Hospital-ah hruai an ni a. Damdawi in director chuan AFP news agency hnenah thenkhat chuan silaimu hliam an tuar a, thenkhat erawh taksa pem leh kak te an ni hlawm tih a sawi a. Mi dangte pawh Colombo National Hospital-ah phurh an ni bawk.
Police-te chuan he thil thlen lai hian lung in chung thenkhat a chim niin an sawi a, buainaa inhnamhnawih hmeichhe thenkhatin hliam an tuar niin AFP chuan a tar lang.
Thil awm dan a inthlak danglam zel avangin Thawhtanni khan lung in tang chhungte chu a pawnah an pungkhawm a. Thenkhat chuan BBC Sinhala hnenah an chhungte awmna hmun leh tute nge dam leh thi tih hriattirna pek an nih loh thu an sawi.
Lung in chhung leh a chhehvel chu tihfai a ni tawh a, police-ten tanpuina an dil hnuah sipaite chu che thei tura inrintir an ni tih Reuters news agency chuan a tar lang.
Prisons commissioner thupuangtu, A. C. Gajanayake chuan tangte chu lung in danga sawn tura hmalak a nih thu a sawi.
Justice & Prisons Minister Harshana Nanayakkara chuan thuneitute chu chhui chiang a, report thehlut turin a hriattir.
Ram chhunga lung in tawt takah buaina a chhuag fo rualin tun tuma mi hi kum tam tak chhunga nasa ber a ni a. December, 2020 khan hmun dangah mi 11 an thi a, mi 117-in hliam an tuar bawk.
Sri Lankan lung in hrang hrangah Pathianni thleng khan tang 41,250 an awm a, hei hi an tang awm thei zat aiin a let liin a tam zawk niin AFP chuan a tar lang.