Aizawl: Agriculture & Farmers’ Welfare Minister P.C. Vanlalruata chuan a department-a thawktute chu hnathawhnaah mahni mawhphurhna chu 100% an pe thei lo a nih pawhin 90% tal pe thei tura tan an lak a ngaih thu a hrilh.
Nilainia Conference Hall, Directorate of A&FW-ah department hnuaia scheme hrang hrang hmalakna thlirletna hun, ‘Review Meeting’ neih a hmanpuinaah minister chuan thawktute thawhrimna zarah an department hmel a mawi tawh tih a sawi a, thawktute tan la zel turin a fuih.
Mizoramah Green Revolution a thlen ve theih nan tan la turin a chah a. Scheme an neihte tihlawhtling tura rinawm leh thahnemngai taka mipuite tana thawk chhunzawm zel turin a chah a; hmasawnna tluantling a awm theih nan hmun hrang hranga scheme kalpui dan enfiah reng a pawimawhzia leh sorkar hnathawkte chu lo neitute kaihruaitu an nih ngei a tul thu a sawi a. “Thlai tharah hma kan sawn viau rualin lo neitute tan ‘value addition’ kalpui zel a tul,” a ti.
Review Meeting hi A&FW Department Secretary Ramdinliani’n kaihruaiin kum 2025-26 chhunga District Agriculture Officer-te hmalakna hrang hrang bakah SAS, Hnahthial, Krishi Vigyan Kendra (KVK), Crop Production Programme, Price Support Scheme, Mizoram Agriculture Marketing Board (MAMB), Green-Ag leh TRIBES hnuaia hmalaknate a sawi a. Ningani hian Centrally Sponsored Scheme leh Central Sector Scheme hnuaia department hmalakna leh 2026-27 chhunga hmalak dan tur, annual action plan an sawiho leh ang.
Review Meeting-ah hian A&FW department hnuaia secretariat, directorate, district leh block-a thawktu hrang hrang bakah department hotute leh mi pawimawh dangte an tel.