Aizawl: Mizorama Viksit Bharat – Guarantee for Rozgar & Ajeevika Mission (Gramin) – VB-G RAM G kalpui tur chu Nilaini khan Vana Pa Hall-ah Rural Development & Administrative Department (RD&AD) Minister Prof. Lalnilawma’n a hawng.
Khuallian chuan ni 100 inhlawhna ang bawka mipuiten VB-G RAM G chu an hman tangkai a beisei thu a sawi a, a hlawhtlin theih nan sorkarin theihtawp a chhuah a, India-ah a scheme notification chhuah hmasa ber chu Mizoram a nih thu a sawi.
State sawrkarin VB-G RAM G a tum ve tur Rs. vaibelchhe 128 pawh chief minister leh finance-in ngai pawimawhin harsatna a awm dawn loh thu a sawi a. A hlawhtlinna tak tak erawh mipui te, VC te, official te thawhhonaah a innghah tur thu a sawi.
Minister chuan India-in zalenna a neih kum 100 a tlin lawmna kum 2047-ah chuan India chu developed country a hlan kai tum a nih thu a sawi a. MGNREGA scheme-ah chuan ni 100 inhlawhna leh community asset din a ngai pawimawh a. VB-G RAM G-ah erawh chuan kum 2047-a ram changkanga India hlang tura a ruahmannaah mipuiten mawhphurhna an nei tih a sawi.
Minister chuan scheme thar hnuaiah hian ni 125 inhlawhna hi mipuite eizawnna nen inkungkaih tlat niin department dangte nen tangkawpin changtlung zawk eizawnna duang tura hmalakna kalpui mek a nih thu a sawi bawk.
Inkhawm kaihruaitu, RD&AD Commissioner & Secretary R. Zarzosanga chuan scheme chu kum 2005-a hman tan, MGNREGA thlak nan July 1-a hman tan tura duan a nih thu a sawi. Ni 125 inhlawhna siam a nih tur thu te, kum khat chhungin ni 60 farming season-ah chawlh siam a nih tur thu leh he scheme thar hi thingtlanga eizawnna siamtu pawimawh tak a nih zel tur thu a sawi bawk.
RD&AD Additional Secretary V. Lalengmawia’n powerpoint presentation hmangin scheme chungchang report a pe a. VB-G RAM G hnuaiah sorkar laipui atangin Rs. vaibelchhe 611.65 leh Mizoram sorkar atangin Rs. vaibelchhe 67.95 dah a nih thu a sawi bawk.
Scheme hi India-a thingtlang zawkte hmasawnna tur atana duan niin May 11, 2026 khan VB–G RAM G Act, 2025 hmangin ram pumah July 1, 2026 atanga hman tan turin a puang a ni a. Kum 2005-a siam, MGNREGA chu thiah a ni thung.
He hunah hian Mizoram sorkar department hrang hrang atangin official te, VC hruaitute, MGNREGS job card holder te, SHG group nu ho te an kalkhawm a ni.